Një marrëveshje shqiptaro-greke që po konfirmohet në heshtje

Pas përfundimit të takimit të Kretës si Bushati ashtu edhe Kotzias deklaruan se nuk u arrit një një marrëveshje konkrete midis Shqipërisë e Greqisë. “MPJ njofton se të dyja palët pranuan rëndësinë e dialogut në zgjidhjen e çështjeve të pazgjidhura dhe ranë dakord për hapat e mëtejshëm që duhen ndërmarrë për të arritur rezultate pozitive duke u mbështetur në vlerat dhe normat evropiane, në të mirë të dy vendeve dhe popujve të tyre. Bisedimet përbënë një hap të rëndësishëm përpara dhe përpjekjet për të gjetur zgjidhje të qëndrueshme për problemet ekzistuese prej një kohe të gjatë do të vijojnë”, thuhej në deklaratën e njëjtë që lëshuan të dy ministritë në përfundim të këtij takimi, pritshmëritë e të cilit duhet thënë se ishin shumë të mëdha.  Pati disa spekulime mediatike nga të dyja anët e kufirit, për rezultate konkrete, por në fund në opinion u perceptua thjesht si një takim i radhës, ku edhe një herë tjetër nuk u gjend “mesi i artë” i problematikave shumëvjeçare. Dhe kur pritej me skepticizëm edhe raundi i dytë Bushati-Kotzias, këtë herë në “fushën tonë” në Korçë, më 20 janar, Qeveria Rama në heshje na konfirmon të kundërtën. Takimi i Kretës paska prodhuar frytet e tij. Një marrëveshje sekrete të shkruar apo një pak xhentëllmenësh këtë koha do ta tregojë së shpejti. Vendimi i Këshillit të Ministrave i 13 dhjetorit për ndërtimin e varrezave të reja të ushtarëve grekë të rënë në Shqipëri gjatë luftës italo-greke, vetëm sa ka zbuluar pikën e parë të saj. Ndërtimi i këtyre varrezave është nga pikat thelbësore të arritjes së një marrëveshje të re me Greqinë, pasi ky ka qenë një nga kushtet kryesore që ka vendosur gati çdo qeveri greke, e djathtë apo e majtë si kjo e sotmja, në bisedimet greko-shqiptare. Publikimi në heshtje i këtij vendimi kaq të rëndësishëm nga Qeveria Rama, që mjaftohet vetëm me hedhjen në faqen zyrtare online dhe kjo me disa ditë vonesë, (paçka se në faqen online të Kryeministrisë publikimi i VKM-ve mban datën 13 dhjetor, është publikuar veç dje më 16 dhjetor), është histori më vete. Pas trompetave nacionaliste dhe trimërive ndaj fqinjit që s’na bllokon dot rrugën për në BE, plotësimi i një prej kërkesave të Greqisë, nga më të debatuarat në opinionin publik shqiptar, veçse në heshtje dhe në fundjavë mund të publikohej. d.c./shqiptarja.com